Ulang Sonai.
Naburon adongma sada turi-turianni Oppung. Bani sada panorang adongma sada mossi nalalap marpusok uhur. Naha ma lang marpusok uhur bana, halani banama nini uhurna na sidorunan halani ibotoh bana dirina mossi do hassa. Mela pangahapna bana mossi Bapa pakon inangna pe mossi do homa.
Jadi bani sada siangni ari, pas bai parmilasni ari iidah bana ma hu atas. Adong ma sada bola nabanggal marsinalsal aima mataniari. Ibagas uhurna ninima, “Aih tene ambit ra ma nian bola nabanggal an jadi inangku!” Dob ai idohori banama dompak mataniari, au pe lang sai hubotoh tangkas sondia ibaen bana ase lang masurbu angkulana mandohori matani ari ai.
Dung dohor ninima bai mataniari ai, nini banama, “Ham mataniari, jenges na i ham huidah bai arian on. Malas ma nian uhurhu anggo ra do ham jadi inangku”
Jadi nini mataniari ai ma mambalosisi, “Mase sonai nim mossi, ai lang dong dope inangmu sonari?” Mase pala ho marloja-loja roh hujon?”
Nini Mossi ai ma use mambalosi, “Aima dahkam, ham ma nahuidah naboi mambaen torang ganup sap tanohon. Maringanan do ham bai nagijang janah boi do idahonni ganup halak Ham, ai do ase sihol uhurhu ase ra ma Ham nian jadi inang bangku”
Mambege ai nini Matani ari ai ma use bani, “Ai anggo ai do nim ambia Mossi, salah do ho i jai! Lang ahu matani ari da si jagonan songon nahinatahon mai nakkin. Ai anggo poltak pe ahu, anggo dong ombun i toruh, ai lang dong be naboi mangidah ahu, lobih ni ai pe lang dong be taridah age otik sinalsalhu songon nanidokmai. Jagonan do ombun ambia marimbang au matani ari!”
Mambogei ai maruhur ma use si Mossi ai nokkan, janah ipindo uhurni ma homa use laho marayak si Ombun mangihutkon hatoranganni mataniari ai. Jadi laho ma bana, ijumpahima Ombun. Dob jumpahsi Ombun ai, manluar ma ia ihatahonma homa songon nakkin hatani ai bai Mataniari, ninima dompaksi, “Ham Ombun, sangap ma Ham tene, domma huidah sangapni Matani ari ai siap ari, tapi anggo roh Ham, tarolat do ganup hagogohon ni Mataniari ai, mirdop ma ganup idahon anggo roh Ham, jadi mangidah ai sihol tumang do uhurhu janah on ma pangindoanhu bamu, ase ra ma nian Ham jadi Inangku, ra do Ham?”
Manangar parhatani si Mossi ai, ibalosi Ombun ai ma homa, nini, “Ho pe da ambia Mossi, anggo manorihi, manonggor, mandarami sijagonan do ho songon naihatahonho nakkin ai, salah tumang do ho ijai da! Ai lang gatni ibotoh ho au pe anggo roh ma alogo bolon, merap ma da hanami. Lang dong boi margogoh age otik hanami anggo domma marombus bana. Jadi anggo manorih si jagonan do ho nim, laho ma ho bai Alogo Bolon, marsahap ma ho bani!”
Ibalosi Mossi ai ma hatani si Ombun, laho ma ia marayak si Alogo Bolon tapi dob jumpahsi ia ihatahon ma aha na adong i bagas uhurni ai, tapi roh ma balosni Logou Bolon songon balosni Matani ari, Ombun nangkin ai. I bai parsahapan ni sidea ai ihatahon Logou Bolon ai do homa, ai adong ope sigogohan marimbang bana. Halani gogoh pe ia marombus, merap do tong anggo jumpah bai dolog-dolog. Jadi mangihutkon aha naihatahon Logou Bolon ai, Dolog do hansa naboi manahan bana marombus.
Dob salpu parbualan ni Mossi ai pakon Logou Bolon ai, lahoma ia homa marayak Dolog, naparlobei sahali iparayak bana aima Dolog Simarjarunjung, dohor hun huta nami Simpang Nagapane. Halani sada huta i lopahni Simarjarunjung aima huta Urung Panei nadong ai ge peternakan. SAlpu Urung Panei, huta ai Simpang Nagapane ma goranna.
Pondokni sahap, dasma Mossi nokkan ai bai Dolog Simarjarunjung. Mandoding-dodingma homa si Mossi on paima marsahap bana. Halani memang tarmasuk nabuei do doding namandodingkon goranni dolog on. Marsahap ma ia dob salu dodingni ai, ninima mamungkah parsahapan. “Ale Ham Dolog Simarjarunjung natarbarita bai ganup inganan, ai domma hutangar baritamu janah hagogohanmu marimbang ganup naadong. Alogo Bolon namarimpot-impot pe boi do itatang Ham. Domma daoh ahu mardalan, namanorihi ganup sipargogoh, humbani Matani ari, Ombun das bamu sadari on. Halani ai humbani bujurni uhur, dearma namin jalo ham au jadi anakmu, hamma Inangku halani ham do nahuidah sijagonan marimbang nalegan nahutandai”, nini si Mossi on ma ai da.
Dear uhurni Dolog ai, ibalosi ma nenget-nenget hatani Mossi on da. Halani tangkas do ge homa ibotoh Dolog on ai dong ope tong na lobih gogoh humbani ia sandiri. Nini bana ma hubani Si Mossi ai, “Ai mase ma pala marloja-loja ho Mossi, sai dia doh maho manorihi sigogohan na songon pingkiran mai? Gogoh pe hanami on bani panonggormu, ai dong dope tong da nalobih margogoh na lang boi taluhonon nami!” Tongon do ai anggo mardosongma Alogou Bolon merap do ai anggo mandohor hu jon, tapi aggo rohma marpiga-piga Mossi ambia i nahei nami an, ai lang tarkahua hanami ai, da! Hope kan sada Mossi do, ai mase pala dorun iahap ho jadi sada Mossi ho? Mulak ma ho, pingkirhonma nahuhatahon on, hanima Mossi do napaling gogoh bennami” Lang ala be ho hujai hujon manorihi, mandarami ise napatut gabei Inangmu. Jadi maho Mossi nadear maruhur. Ulang be malungun uhurni Inangmai ibahen ho. Ulang sonai be pingkiranmu, Jaloma ibagas malas uhur dirim, Mossi pe ho dong do gok lobihan ibam marimbang naleganan”
Mulak ma ia marlintun lari lobih bani biasani, hampir 35.5km/jam. Ai hundatas ni Dolog Simarjarunjung dohorni Pemancar TVRI na i punck ai nari marlintun do ia sampai dohor hu Peternakan. I toruskon bana ma marlintun anjaha lang pala songon namarngayot be iahapkon angkulana agepe sonai daohni ia marlintun. Halani aha nadong bai pingkiranni aima ase podas jumpah ia pakon Inangni ai. Manektek ma homa iluhni sada-sada manosali ganup pingkiran pakon parsahapni nasaon dokahni. Das ma ia, jumpah pakon inangni, irohop ma inangni ai janah riap ma nasida tangis.
Moral Cerita:
Syukurilah apa saja yang ada padamu saat ini, terhadap apapun yang tidak dapat engkau ubah. Berdoalah agar kamu bisa menerima itu, dan mengerti apa yang bisa kamu raih, dan hikmat untuk membedakan keduanya.
